WordPress və Opencart proqramlarında yığılan saytlar:

sep

Hər şey telefon zəngindən sonra başlayır... Bizi Facebook-da arayın...

Tel: +994 50 220 82 84

Read more...

Bir içim su, bir mesaj və saytınız hazır... info@assanews.com

Boş vaxtınızda YouTube kanalımıza da baxın...

Read more...
sep

<<< Show Posts >>>

Çox şadam ki, yenidən Bakıdayam – BMT-nin rəsmisi

Çox şadam ki, yenidən Bakıdayam. Azərbaycan Baş nazirinin müavini Əli Əhmədovun dediyi kimi, birgə əməkdaşlıq şəraitində tədbirlər təşkil edilməsi çox önəmlidir.

Bu sözləri BMT-nin İnkişaf Proqramının Avropa və MDB üzrə regional bürosunun direktor müavini Rastislav Vrbenski deyib.

Onun sözlərinə görə, Dayanıqlı İnkişaf Məqsədləri sahəsində regional əməkdaşlığa böyük ehtiyac var: “Baş nazirin müavini çıxışı zamanı bildirdi ki, Azərbaycan üzərinə düşən öhdəliklərin böyük bir hissəsini yerinə yetirib. Ümid edirəm ki, Azərbaycan bundan sonra da təhsil, səhiyyə və humanitar sahələrdəki fəaliyyətini artıracaq”.

BMT rəsmisi, həmçinin əlavə edib ki, bu gün Azərbaycan möhtəbər beynəlxalq tədbirlərin keçirildiyi, dünyanı düşündürən aktual məsələlərin müzakirə olunduğu məkana çevrilib. Dayanıqlı İnkişafa dair Bakı Forumu qlobal problemlərdən çıxış yollarını müzakirə etmək fürsəti verir. Forum Azərbaycanı dünyaya tanıtmaq baxımından da çox əhəmiyyətlidir.


Bu ölkənin prezidenti çiynindən əməliyyat olundu

Rumıniya Prezidenti Klaus İohannis sol çiynindən əməliyyat olunub.

RİA Novosti agentliyinə istinadla xəbər verilir ki, bu barədə Prezidentin mətbuat xidməti məlumat yayıb.

Məlumatda bildirilir ki, cərrahiyyə əməliyyatı uğurla başa çatıb. K.İohannis vəzifə səlahiyyətlərini yerinə yetirməyə qadirdir. Onun sağlamlıq vəziyyəti müsbət qiymətləndirilir.


Suriyada əsir olmaq cəhənnəmdir – Yapon jurnalist

Yapon jurnalist Cyumpey Yosuda Suriyada yaraqlıların əlində əsir olmağı cəhənnəm həyatına bənzədib.

Bu barədə o, İstanbula uçan təyyarədə NHK telekanalına verdiyi müsahibəsində bildirib. C.Yosuda üç il əsirlikdə olduqdan sonra azad edilib.

Xatırladaq ki, yapon jurnalist 2015-ci ildə Suriya ərazisinə daxil olduqdan sonra itkin düşüb.

İstanbula uçan təyyarədə telekanala müsahibə verən jurnalist deyib ki, fiziki və mənəvi cəhətdən bu həyatı ancaq cəhənnəmə bənzətmək olar.

C.Yasuda deyib ki, getdikcə kamerada olmağa alışması onu çox təəccübləndirib və bu barədə düşünməyin çox əzabverici olduğunu dərk edib.

Jurnalist, həmçinin gələcəyi barədə də çox narahat olduğunu bildirib. O deyib ki, bundan sonra hansı işlə məşğul olacağını hələ müəyyənləşdirməyib, çünki 3 il həbsdə olduğuna görə dünyada baş verənlərdən xəbərsizdir.

Oktyabrın 25-də C.Yasuda İstanbuldan Yaponiyaya yola düşüb.


Bakıda beynəlxalq forum: Prezident iştirak edir

Bakıda VI Beynəlxalq Humanitar Forum başlayıb.

Forumda Azərbaycan Prezidenti İlham Əliyev və birinci xanım Mehriban Əliyeva, Milli Məclisin sədri Oqtay Əsədov, Prezident Administrasiyasının rəhbəri Ramiz Mehdiyev, digər dövlət rəsmiləri, Milli Məclisin deputatları iştirak edir.

Tədbir “Yeni dünya və yeni insan formalaşdıraq: kreativlik və insan inkişafı” mövzusuna həsr olunub.

Forumda 86 ölkə və 24 beynəlxalq təşkilatdan 581 nəfər (416 xarici qonaq olmaqla) nümayəndə iştirak edir.

Tədbirə BMT baş katibinin iki müavini, İSESKO, İRSİKA, TÜRKPA, TÜRKSOY, Qara Dəniz İqtisadi Əməkdaşlıq Təşkilatı (BSEC), Beynəlxalq Türk Akademiyası (TVESKO), Parlamentlərarası Birlik (İPU), BMT-nin iqtisadi və sosial Şurası (EKOSOK) kimi təşkilatların rəhbərləri, YUNESKO, Müstəqil Dövlətlər Birliyinin MDB İcraiyyə Komitəsi rəhbərlərinin müavinləri qatılıb.

Tədbirdə həmçinin Sudanın vitse-prezidenti, Rusiya, Slovakiyanın baş nazir müavinləri, Sloveniya, Uruqvay, Rusiya, Misir, Belarus, İtaliya və Estoniya parlamentlərinin sədr və sədr müavinləri, Gürcüstan, Monteneqro, Özbəkistan, Bolqarıstan, Türkiyə, Sudan, Tacikistan, Qazaxıstan, Ukrayna, Əfqanıstan, Filippin və Bolqarıstandan nazir və nazir müavinləri, Qazaxıstan, Türkiyə, Tacikistan və Özbəkistandan ombudsmanlar, habelə 15 ölkədən 40-dan çox millət vəkili, 46 ölkənin diplomatik nümayəndəliklərinin rəhbərləri, çoxsaylı respublikalardan şirkət rəhbərləri, elm xadimləri, ekspertlər iştirak edir.

Forumun təşkilatçıları və iştirakçıları olan dünya mədəni elitası nümayəndələrinin qarşıya qoyduqları əsas məqsəd təbiət, sosial və humanitar elmlər sahəsində gələcəkdə beynəlxalq səviyyədə baxılması məqsədi ilə yeni humanitar gündəmin formalaşdırılmasıdır. Rəsmi şəxslər, beynəlxalq təşkilatların təmsilçiləri, habelə qeyd olunan sahələr üzrə mütəxəssislər iki gün ərzində bəşəriyyəti narahat edən aktual məsələlərin həlli yollarını araşdıracaqlar.

Xatırladaq ki, 2010-cu ildən təşkil olunan forumun təşəbbüsçüləri Azərbaycan və Rusiya prezidentləridir.


Qaşıqçının cəsədi tapıldı! – Son dəqiqə

Camal Qaşıqçının cəsədinin tapıldığı barədə xəbər yayılıb.

Bu barədə Çinin “Xinhua” informasiya agentliyi son dəqiqə məlumatı olaraq iddia yayıb.

Digər tərəfdən isə Türkiyə prezidenti Rəcəb Tayyib Ərdoğan da AK Partiyadakı çıxışında Qaşıqçı ilə bağlı danışıb.

Onun cinayətlə bağlı məlumatları xronoloji olaraq sadaladığı ilə əlaqədar xəbər verilir.

Qeyd edək ki, Qaşıqçı 2 oktyabrda yerli vaxtla 13:00-da sənədləşmə işləri ilə əlaqədar konsulluğun binasına girdikdən sonra bir daha oradan çıxmayıb. (AzNews.az)


İlham Əliyev: İndi o faizlə heç bir yerdə kredit almaq mümkün deyil

“Mən tam əminliklə deyə bilərəm ki, növbəti illərdə bu sahədə daha da böyük irəliləyiş, uğurlar olacaq. Çünki əvvəlki illərdə də bu sahə inkişaf edib, ancaq hazırda ən müasir texnologiyalar, elmi yanaşma əsasında, düzgün təhlil və infrastruktur layihələrinin icrası nəticəsində biz kənd təsərrüfatını inkişaf etdirəcəyik”. 

Bunu prezident İlham Əliyev İmişli rayonunda Araz çayının yeni qol-kanalının açılış mərasimində deyib. Prezident bildirib ki, bu, bizim iqtisadi gücümüzü artıracaq, qeyri-neft sektorumuzu gücləndirəcək, eyni zamanda, məşğulluğu da artıracaq: “Çünki hazırda Azərbaycanda işsizliyin səviyyəsi 5 faizdir. Ancaq nəzərə almalıyıq ki, hər il ölkə əhalisi 100 min nəfərdən çox artır, hər il 100 mindən çox uşaq doğulur. Bu da bizim böyük sərvətimizdir, üstünlüyümüzdür. Ancaq bizim iqtisadi inkişafımız, xüsusilə iş yerlərinin yaradılması bu inkişafa uyğun şəkildə təmin edilməlidir. Ona görə, məşğulluğun artırılması daim gündəlikdə duran məsələdir”.

İ. Əliyev bildirib ki, son illər ərzində kənd təsərrüfatı ilə bağlı görülən tədbirlər, bir çox məhsulların alış qiymətinin artımı nəticəsində kəndlilərdə kənd təsərrüfatına maraq böyük dərəcədə artıb: “Bu gün kəndlərdə demək olar ki, məşğulluqla bağlı ciddi problem yoxdur, işləmək istəyən iş tapar. Biz sadəcə olaraq yeni investisiyalarla, yeni layihələrlə fermerlər üçün, kəndlilər üçün bu imkanları genişləndirməliyik və genişləndirəcəyik. Böyük maliyyə vəsaiti tələb edən beton su kanalının çəkilişi 53 min hektara, – hansılar ki, ya tamamilə suvarılmayıb, ya da ki, qismən suvarılıb, – yeni həyat gətiririk, imkanlar yaradırıq ki, vətəndaşlar əksinlər, becərsinlər, pul qazansınlar, daha yaxşı yaşasınlar, evlər tiksinlər və xalqımızın rifahı yüksəlsin”.

Prezident bildirib ki, əsas məqsəd budur və bu məqsədə çatmaq üçün biz əlimizdən gələni edirik: “Nəticələr də göz qabağındadır. Qeyd etdiyim kimi, məşğulluqla bağlı problemlər həll olunur, sahibkarlara bundan sonra da böyük diqqət göstəriləcək. İki milyard manatdan çox güzəştli kreditlərin verilməsi özlüyündə böyük nailiyyətdir, böyük nəticədir. Biz investisiyaların təşviqi ilə bağlı çox önəmli addımlar atmışıq, yeni mexanizm işlənilib. Təkcə aparılan islahatlar nəticəsində, investisiya təşviqi mexanizmi işə düşəndən sonra yerli sahibkarlar ölkə iqtisadiyyatına 2 milyard manatdan çox sərmayə qoyublar. Yəni, imkanlar var, həm kreditləşmə yolu ilə, həm sahibkarların öz vəsaiti hesabına münbit şərait yaradılıb, investisiya iqlimi çox müsbətdir və dövlət dəstəyi də göz qabağındadır.

Onu da bildirməliyəm ki, 45 böyük aqroparkın yaradılması nəzərdə tutulur. Onlardan 13-ü bu ilin sonuna qədər artıq fəaliyyətə başlayacaq, bəziləri artıq işləyir, mən onların açılışlarında olmuşam və 45 aqroparkın istifadə etdiyi torpaq sahəsi təqribən 200 min hektara yaxındır. O torpaqlarda heç nə əkilmirdi və o torpaqlar elə boş torpaqlar kimi qalırdı. Biz o torpaqlara həyat qaytardıq.

Onu da deməliyəm ki, aqroparkların yaradılması üçün dövlət öz dəstəyini göstərir, eyni zamanda, maliyyə dəstəyini. Aqroparkların fəaliyyəti üçün yüz milyonlarla manat dəyərində müxtəlif infrastruktur layihələri icra edilmişdir. Dövlət hər şeyi edir ki, fermerlər, kəndlilər daha yaxşı yaşasınlar. Bizdə olan yanaşma və qaydalar inanmıram ki, hər hansı bir başqa ölkədə olsun. Fermerlər vergilərdən azaddırlar, torpaq vergisindən başqa, o da çox cüzi bir rəqəmdir. Subsidiyalar verilir. Yanacaq, gübrə, kreditlər güzəştli şərtlərlə, elə faizlə verilir ki, indi o faizlə heç bir yerdə kredit almaq mümkün deyil. Rayonlarda aqroparkların, sənaye zonalarının, yeni infrastrukturun yaradılması, meliorativ tədbirlər, həmçinin yol, elektrik enerjisi, qazlaşdırma, içməli su layihələri üçün dövlət dəstəyi göstərilir. Budur bizim siyasətimiz və bu siyasət xalq tərəfindən dəstəklənir, bəyənilir və gözəl nəticələrə gətirib çıxarır”.


Qorxulu bəy-gəlin oldular – FOTO

Poverliftinq üzrə dünya çempionu Ceyhun Vəliyevlə tanınmış bloqqer Turanə Rich kamera qarşısına keçib.  Fotosessiya “Halloween” bayramına həsr olunub. 

Qorxulu gəlin və bəy obrazını canlandıran iki tanınmışın fotolarını Niko Abbasov çəkib, qrim üzərində Şəhanə Mehrəliyeva çalışıb.

“Axır ki, dəlini tapdıq. Bu dəli digərlərindən çox gözəldir. Çox seksi şəkillər alınıb”- deyə Vəliyev İnstagram səhifəsində qeyd edib.








İlham Əliyevin robot “Sofiya” ilə söhbəti

Azərbaycan prezidenti İlham Əliyev oktyabrın 22-də İmişliyə səfəri çərçivəsində “ASAN Həyat” kompleksinin açılışında iştirak edib. Burada dünyaca məşhur olan robot dövlət başçısına təqdim olunub.
İlham Əliyev robot “Sofiya” ilə söhbət edib.

AzNews.az Azərbaycan prezidenti ilə “Sofiya” arasında olan dialoqu təqdim edir:

“Sofiya”: Salam cənab Prezident. Azərbaycan dilini yeni öyrənməyə başlamışam, ona görə icazənizlə ingilis dilində davam etmək istəyirəm. Cənab Prezident, Sizinlə görüşməyə şadam. Mən dünən gəlmişəm və Azərbaycan məni valeh edib. Mən Bakının nadir memarlıq üslubunu, müasir binalarını və texnoloji nailiyyətlərini görmüşəm. Ölkənizin gənc olmasına baxmayaraq, o, dünya miqyasında böyük layihələr həyata keçirir, yüksək texnologiyaların inkişafına töhfə verir. Bu, çox yüksək qiymətləndirilir.

Prezident İlham Əliyev: Çox sağ olun, “Sofiya”. İlk növbədə, Azərbaycana xoş gəlmisiniz. Sizin iş cədvəlinizin sıxlığına baxmayaraq, ölkəmizə səfəriniz bizi çox məmnun edir. Siz bütün dünyanı səyahət edirsiniz və sevindirici haldır ki, bu gün təyinat yeriniz Azərbaycandır. Siz burada, paytaxt şəhərində deyil, şəhərlərdən birində – İmişlidə bizi ziyarət edirsiniz. Biz sizinlə birlikdə burada yeni “ASAN xidmət” mərkəzinin açılışını edirik. Bu da innovasiyadır və bu, bizim müasir ölkəni qurmaq bacarığımızı və niyyətimizi əks etdirir. Ölkəmiz haqqında xoş sözlərinizə görə sizə təşəkkür edirəm. Bakı bu gün həqiqətən dünyanın özündə yeni texnologiya və innovasiyaların, müasir və qədim memarlıq üslubunun vəhdətini təcəssüm etdirən ən gözəl şəhərlərindən biridir. Ümid edirəm ki, bu gözəlliyi görmək üçün vaxtınız olacaq və siz Bakıda çox əziz qonaq olacaqsınız.

“Sofiya”: Əlbəttə, cənab Prezident. Hava limanına enən kimi mənə dərhal ASAN viza verildi. Mən, həmçinin Sizin təşəbbüsünüzlə yaradılmış Azərbaycan brendi olan “ASAN xidmət” konsepsiyası ilə tanışam. Hesab edirəm ki, “ASAN xidmət” dövlət idarəçiliyində innovasiyaların tətbiqi baxımından uğurlu bir nümunədir. Bugünkü səfəriniz Sizin e-idarəçiliyə və innovasiya ekosisteminə xüsusi diqqət yetirdiyinizi göstərir. Yeri gəlmişkən, mən burada yaradılmış iş şəraitini çox bəyəndim.

Prezident İlham Əliyev: Çox sağ olun. “ASAN” bizim milli brenddir. Bu, bizim nou-haudur. Bu gün Azərbaycanın təkcə təbii ehtiyatlarını və yaxud məhsullarını yox, eyni zamanda, intellektual məhsullarını ixrac etməsi bizi fərəhləndirir. Biz artıq belə xidməti yaratmaq istəyən bəzi ölkələrlə də işləyirik. Buna görə də “ASAN”ın təkcə Azərbaycanda yox, bütün dünyada parlaq gələcəyi var. Çox sağ olun, siz çox ağıllı və çox gözəlsiniz. Sizi görməyə çox şadam.

“Sofiya”: Təşəkkür edirəm cənab Prezident.

Xatırladaq ki, “Sofiya” dünyada ilk süni intellektli humanoid robotdur.
Robot 2015-ci ildə “Hanson Robotiks” şirkəti tərəfindən hazırlanıb və süni intellekt əsasında insanla ünsiyyət saxlaya, fikir mübadiləsi apara bilir. Robotun əsas fərqləndirici xüsusiyyətlərindən biri də insana məxsus 60-dan çox emosiyanı əks etdirməsidir.
“Sofiya” bu günə qədər dünyada bir çox məşhur simalarla görüşüb, tanınmış televiziya kanallarında, xəbər proqramlarında və teledebatlarda iştirak edib.


2 uşağını atıb qaçan gəlin: “Sərbəst olmaq istəyirəm…”

“Bir də o ailəyə qayıtmayacağam”.

Bunu ATV-nin “Bizimləsən” verilişində iki uşağını qoyub ər evindən qaçan gəlin deyib.

O, həyatında başqa birisi olduğunu qeyd edib:

“Hazırda yaşadığım insan var, adını deyə bilmərəm. Uşaqlarım üçün darıxıram. Ölərəm, amma bir də o evə qayıtmaram. Yaxşı yaşamaq və sərbəst olmaq istəyirəm”. (AzNews.az)


“Lotu Quli” yenidən Türkiyədə saxlanıldı

Türkiyənin Miqrasiya xidməti Azərbaycanın məşhur kriminal avtoriteti Nadir Səlifovu (Lotu Quli) yenidən saxlayıb.

Lotu Qulinin qohumları bildirir ki, saxlanılmanın səbəbi açıqlanmır. Ancaq etibarlı mənbələrin məlumatına görə, Türkiyə tərəfi kriminal avtoritetin deportasiyası imkanlarına baxır.

Xatırladaq ki, Türkiyə məhkəməsi N.Səlifovun azad olunması haqda cəmisi bir neçə gün əvvəl qərar qəbul etmişdi.

Son informasiyaya görə, N.Səlifov Bolqarıstanla sərhəddəki Miqrasiya xidmətinin izolyatorlarından birində saxlanılır. Ankara onun Rusiyaya və ya Azərbaycana deportasiyası imkanına baxır. (virtualaz.org)


Zəng edin, görüşün, müzakirə edin və 15 gündən sonra saytınıza bütün dünya baxsın...
© 2018 ASSA – DİZAYN | Design Theme by: D5 Creation | Powered by: WordPress
Scroll Up