WordPress və Opencart proqramlarında yığılan saytlar:

sep

Hər şey telefon zəngindən sonra başlayır... Bizi Facebook-da arayın...

Tel: +994 50 220 82 84

Read more...

Bir içim su, bir mesaj və saytınız hazır... info@assanews.com

Boş vaxtınızda YouTube kanalımıza da baxın...

Read more...
sep

<<< Show Posts >>>

Ərdoğan Trampla görüşdü

Türkiyə prezidenti Rəcəb Tayyib Ərdoğan amerikalı həmkarı Donald Trampla Parisdə bir araya gəlib.

Iki lider Birinci Dünya müharibəsinin başa çatmasının 100 illiyinə həsr olunmuş tədbirlərlə bağlı ölkə rəhbərləri şərəfinə verilən axşam yeməyində ayaqüstü söhbətləşiblər.

Ziyafətə xanımları ilə birlikdə qatılan Ərdoğan və Tramp daha sonra masada yanaşı əyləşərək söhbətlərini davam etdiriblər.

Qeyd edək ki, amerikalı rahib Endryu Branson azadlığa buraxılmasından sonra Türkiyə və ABŞ arasında siyasi gərginlik azalıb.


Putinə bürüncdən hazırlanan qamçı verdilər – Qazaxıstanda

Qazaxıstan və Rusiya prezidentləri – Nursultan Nazarbayev və Vladimir Putin Petropavlovsk şəhərində hər iki ölkənin regionlarının əməkdaşlığına həsr olunan Forumun açılışında iştirak ediblər. Liderlər forum çərçivəsində “Turizmin inkişafında yeni yanaşmalar” sərgisinə tamaşa ediblər.
Orta Asiya Xəbər Xidmətinə istinadən xəbər verilir ki, prezidentlər təkcə ekskursiya rəhbərlərinə qulaq asmayıblar, həm də sərginin iştirakçıları ilə söhbət ediblər.
Misal üçün batırlardan biri bir saniyənin içində uzun mismarı Hacımukan qovşağına batıraraq Putinə təqdim edib.
Nazarbayev isə Putinə: “İndi Vladimir Vladimiroviç bunu açın” deyərək zarafat edib. Hər iki prezident ətrafdakıların alqışları ilə bunu açmağa çalışıblar.
Putinə, həmçinin “Aldıyar” qamçısı da hədiyyə verilib. Məlum olub ki, bu qamçının əsası bürüncdən hazırlanıb, üzü isə qızıl və gümüşlə əhatə olunub.
Bu qamçı Qazaxıstanda əl işi ilə ərsəyə gətirilib. (AzNews.az)


Rusiya Ukraynanın bu şəhərini də ələ keçirmək istəyir – britaniyalı polkovnik

Rusiyanın Azov dənizindəki addımlarının əsas məqsədi Ukraynanın Mariupol şəhərini ələ keçirməkdir.

Rusiya mediasına istinadən xəbər verilir ki, bu fikirləri britaniyalı polkovnik, Ukraynanın milli təhlükəsizlik və müdafiə işləri üzrə institutunun eksperti Qlen Qrant səsləndirib.

Ukrayna jurnalistlərinə müsahibə verən polkovnik bildirib ki, hazırda bu bölgədə Rusiyanın böyük üstünlüyü var:

“Onların məqsədi Mariupolun bütün biznesini, infrastrukturunu dağıtmaqdır. Bu, hələlik Rusiyanın ilk addımıdır. Onlar bütövlükdə Ukraynanın cənub hissəsini ələ keçirmək istəyirlər. Kiyevin isə bunu dayandırmağa gücü çatmır”.  (AzNews.az)


Qazaxlar Nazarbayevin yenidən seçiləcəyini – ABŞ mediası isə seçilməyəcəyini deyir

Xəbər verildiyi kimi 2019-cu ilin əvvəlində Qazaxıstanda növbədənkənar prezident seçkiləri keçiriləcək. Yerli analitiklər hesab edir ki, Nursultan Nazarbayev yenidən prezident kreslosuna oturacaq. ABŞ-ın “Diplomat” nəşri isə qazaxıstanlı milyarder Timur Kulibayevin prezident olacağı proqnozunu verir.

Rusiya mediasına istinadən xəbər verilir ki, Qazaxıstanın Telegram telekanalına müsahibə verən hakimiyyətin işi üzrə mütəxəssis Yerbol Yedilov Nazarbayeyin yenidən öz vəzifəsində qalacağını deyib.

Siyasətçi Kazbek Beysebayev isə özünün Facebook səhifəsində Nazarbayevin yenə də ölkə başçısı olacağını bu dəlillərlə izah edib:

“Nazarbayev ilin sonunadək əhali üçün elektrik energisinin tariflərinin aşağı salınması haqda göstəriş verib. Bu isə əmək haqqının qaldırılmasına və qiymətlərin düşməsinə gətirib çıxaracaq. Bütün bunlar növbədənkənar seçkilərə dəstək nümayişidir”.

ABŞ-ın “Diplomat” nəşri isə oktyabr ayının sonlarında Nazarbayevin yerinə kimlərin gətiriləcəyi haqda mülahizələrini dərc edib. Məqalədə deyilir ki, Senatın spikeri Kasım-Jomart Tokayev, Milli Təhlükəsizlik Komitəsinin rəhbəri Kərim Məsimov, senator, hazırkı prezidentin qızı Dariqa Nazarbayeva, Qazaxıstanın Rusiyadakı səfiri İmanqali Tasmaqambetov və “Kazenerji” Assosiasiyasının başçısı Timur Kulibayev prezident seçilə bilərlər.

Ancaq mənbə daha çox Timur Kulibayevin prezident seçiləcəyini önə çıxarıb: “Kulibayev rəsmən milyarderdir. Milli Bankın sədri olan Timur Forbes jurnalında Qazaxıstanın ən varlı insanları siyahısına daxil edilib.

Beləliklə, yerli siyasətçilər Nazarbayevin, ABŞ mediası isə Kulibayevin prezident seçiləcəyi anonsunu veriblər. (AzNews.az)


22 yaşlı biznesmen: “İşə başlayanda anamın ilk sözü “kül başına” oldu”- Müsahibə

“Xeyirli olsun” layihəsinin bu dəfəki müsahibi “Saat store” mağazalar şəbəkəsinin təsisçisi Hüseyn Hümbətovdur.

Hüseyn Hümbətovla müsahibəni sizə təqdim edirik:

– Özünüzü təqdim edə bilərsiniz?

– Mən Hüseyn Hümbətov 1996-cı ildə anadan olmuşam, 22 yaşım var. Azərbaycan Dövlət İqtisad Universitetinin maliyyə fakültəsini bitirmişəm.

– Neçə yaşınızdan işləməyə başlamısınız?

– Mən çox balaca yaşdan işləməyə başlamışam. İlk dəfə işə düzələndə 11 yaşım var idi. Yay ayları idi, vaxtımı səmərəli keçirmək həm də pul qazanmaq istəyirdim. Bu, tək istək deyildi, tələbat idi. Çünki maddi vəziyyətimiz o qədər də yaxşı deyildi. İlk iş yerim avtoyuma məntəqəsi idi. Mənə gündəlik 5 manat əmək haqqı verirdilər. O vaxtlar həyatda ən böyük məqsədim, bu işi daha yaxşı öyrənib, o biri işçilər kimi daha çox pul almaq idi. Daha sonra bir çox yerdə işlədim. Həm məktəbə gedirdim, həm işləyirdim.

– “Saat store” brendini yaratmaq necə ağlınıza gəldi?

– Qəbul imtahanında gözlədiyim nəticəni əldə etməmişdim, sınaqlarda 500-600 bal yığsam da, qəbul imtahanında 1 saat yatdığım üçün 376 bal yığdım. Ailəmizin maddi vəziyyəti yaxşı deyildi və mən ödənişli əsaslarla təhsil alırdım. Buna görə də, fəhlə bazarında işləyib, həm xərclərimi, həm təhsil haqqımı qazanmağa çalışırdım. O vaxt çox bahalı bir saatım var idi, saatım qırıldığı üçün onun hissələrini axtarmağa başladım. Əvvəldən də saatlara marağım böyük idi. Həmin saatın hissəsini tapmaq üçün mağazalar gəzdikcə bu qərara gəldim ki, saat satım.

– Ailənizin ilk reaksiyası nə oldu?

– İlk dəfə saat satmağı qərara alanda cəmi 6 manat pulum var idi. 6 manata üç saat alıb evə gəlmişdim. Anam saatları görəndə “əvvəl bir-bir alırdın, indi üç-üç almağa başlayıbsan?” dedi. Cavab verdim ki, saatları satmaq üçün almışam. Anamın ilk sözü “kül başına” oldu. Həmin 6 manatı bir həftə içində 83 manat etdim. Daha sonra ailəm həmişə dəstək oldu mənə, hələ də hər işimdə arxamda dayanırlar.

– Hazırda neçə mağazanız var?

– İlk mağazamı 3 il əvvəl açdım. Hazırda Bakıda 4 mağazam var. Daxili bazarla, yanaşı xarici bazara da çıxırıq, bu yaxınlarda Gürcüstanda böyük bir mağaza açdıq. Həmçinin Türkiyədə də bir mağazamız fəaliyyətdədir.

– Digər saat mağazalarından fərqiniz nədir?

– Bizim əsas fərqimiz bundadır ki, müştəri məmnuniyyətinə daha çox əhəmiyyət veririk. Saatlarımızı iki il zəmanətlə müştərilərimizə satırıq. Həmin iki il müddətində saata nəsə olsa, tam ödənişsiz dəyişib, ya da təmir edirik. Hətta müştəri saatı özü qırsa belə, biz onu təmir edirik.

– Hazırda hansı planlarınız var?

– Əsas fikrimiz Azərbaycan brendi istehsal etməkdir. Bunun üçün danışıqlar aparılır. Çinə səfərim zamanı orda saatların istehsalı prosesi ilə tanış olmuşam. Fikriləşirəm ki, nəyə görə “Made in Azerbaijan” brendi olmasın. Artıq danışıqlar gedir, hələ ki, tam məlumat verə bilmirəm. Amma bunu deyə bilərəm ki, ilk istehsal etdiyimiz saat ümummilli liderimiz Heydər Əliyevin adına olacaq. Bunu ona görə edirik ki, hamı görsün, biz liderimizi unutmamışıq.

– Saatlar Azərbaycanda istehsal olunacaq?

– İki fikrimiz var, ya saatın hissələrini xaricdən alıb burda öz ustalarımıza yığdıracağıq, ya da hissələri istehsal edən aparatları alıb, Azərbaycana gətirəcəyik. Hər iki halda saat Azərbaycanda istehsal olunacaq.

– Həmin saatların qiyməti necə olacaq? Satış hər kəsə açıq olacaq?

– Qiyməti dəqiq deyə bilmərəm, amma əmin olun ki, hamıya münasib olacaq. Hər kəs alıb istifadə edə biləcək. Satış da hər kəsə açıq olacaq, bir çox ölkədə satışa çıxarılacaq. Həmin saatı müxtəlif internet satış portallarından və ya elə bizim mağazalarımızdan əldə etmək mümkün olacaq. (AzNews.az)


Yanmış cəsədini Xəzər sahilində dəfn etdilər, 2 ay sonra qapını açıb evə girdi – ŞOK OLAY

Bu yaxınlarda bir qazax ailəsi yaşlı qohumlarının zorakı və müəmmalı ölümünün sarsıntısını yaşamalı olub.

BBC-Azərbaycan-a istinadən xəbər verilir ki, hadisə Qazaxıstanda baş verib. Belə ki, Esenqali Supıqaliyev adlı qazax dayısının meyiti barəsində maraqlı faktı açıqlayıb. Onun sözlərinə görə, dayısının meyiti evə gətiriləndə az qalıb ki, qızı Sauleni infarkt vursun. Meyit elə bir halda idi ki, onu tanımaq mümkün olmayıb.

63 yaşlı Ayqali Supıqaliyev iyun ayında evdən çıxmış və bir daha qayıtmamışdı. Ayqalinin əvvəllər də bir-iki həftəliyə yoxa çıxmaq xasiyyəti olduğuna görə, ailəsi heç yerə xəbər etmədən onu bir ay gözləyib. Bundan sonra polis onları yanmış bir cəsədin tanınmasına çağırıb. DNT analizləri də meyitin 99,2 faiz Ayqaliyə məxsus olduğunu təsdiqləyib. Onun adına ölüm şəhadətnaməsi tərtib olunub.

Sentyabr ayında ailəsi Ayqalini Xəzər sahilindəki Atırau portunun yaxınlığında yerləşən Tumarlı kəndinin müsəlman qəbiristanlığında dəfn edib.

Hadisədən 2 keçəndən sonra Ayqali qapını açıb evə girəndə aləm bir-birinə dəyib.

Sən demə, o, iyun ayında evdən çıxan kimi bazarda qonşu kənddən olan bir nəfərə rast gəlib və o, Ayqaliyə iş təklif edib. 4 aylıq işini başa vuran Ayqali evinə qayıdıb.

Supıqaliyev isə dilxor olub ki, qohumları onun üçün başdaşının pulunu da artıq ödəyiblər. Hətta onun iki aylıq pensiyasını də dövlətə qaytarıblar. İndi ailə məhkəməyə müraciət etmək fikrindədir.

Amma bir sual açıq qalır. Esenqali deyir: “Görəsən, biz kimi dəfn eləmişik? Allah bilir, indi onu da ailəsi axtarır…”. (AzNews.az)


Xalq artisti Amaliya Pənahova dəfn olundu – Yenilənib

Azərbaycanın xalq artisti Amaliya Pənahova “Qurd qapısı” qəbiristanlığında torpağa tapşırılıb.

Dəfn mərasimində mərhumun ailə üzvləri ilə yanaşı, tanınmış mədəniyyət və incəsənət xadimləri, dostları, kino və teatr xadimləri, ictimaiyyət nümayəndələri iştirak ediblər.

11:34

Xalq artisti Amaliya Pənahova ilə vida mərasimi keçirilib.

Azərbaycan Dövlət Akademik Milli Dram Teatrının binasında müasir Azərbaycan teatrı və kino sənətinin tanınmış nümayəndəsi, xalq artisti Amaliya Pənahova ilə vida mərasimi başa çatıb.

Vida mərasimində mərhumun ailə üzvləri ilə yanaşı, tanınmış mədəniyyət və incəsənət xadimləri, rəsmi şəxslər iştirak ediblər.

Mədəniyyət naziri Əbülfəs Qarayev bildirib ki, Azərbaycan mədəniyyətinə ağır itki üz verib: “Amaliya Pənahova Azərbaycan teatrı üçün bəlkə də əvəzolunmaz şəxslərdən biridir. Bu hadisəyə cəmiyyətimiz tərəfindən olan reaksiya bir daha onu göstərir ki, teatr sənəti çox vacib bir sənətdir. Teatr Azərbaycan xalqının ayrılmaz bir hissəsidir”. Sonra nazir Amaliya Pənahovanın həyat və yaradıcılığından danışıb.

A.Pənahovanın cənazəsi vəsiyyətinə əsasən həyat yoldaşı, xalq artisti Yusif Muxtarovun yanında dəfn olunması üçün “Qurd qapısı” qəbiristanlığına aparılıb.

Qeyd edək ki, A.Pənahova ötən gün xərçəng xəstəliyindən 73 yaşında vəfat edib.

Xatırladaq ki, Amaliya Pənahova 1945-ci il iyunun 15-də Gəncə şəhərində anadan olub. Orta məktəbi bitirdikdən sonra o, 1962-1966-cı illərdə Azərbaycan Dövlət Teatr İnstitutunun dram və kino aktyorluğu fakültəsində ali təhsil alıb. 1964-cü ildə Azərbaycan Dövlət Akademik Milli Dram Teatrının aktyor truppasına qəbul edilən Amaliya Pənahova burada 1992-ci ilədək səhnə fəaliyyətini davam etdirib. O, 1992-ci ildə Bakı Bələdiyyə Teatrını yaratmış və ömrünün sonunadək həmin teatra rəhbərlik edib. O, ölkənin ictimai-siyasi həyatında yaxından iştirak etmiş, ikinci çağırış Milli Məclisinə deputat seçilib. “Şöhrət” və “Şərəf” ordenləri və “Azərbaycan Respublikası Prezidentinin fəxri diplomu” ilə təltif edilib.(report.az)

image description

image description
image description

Ordumuz Naxçıvanda yenə irəlilədi: bütün strateji yüksəkliklər tutuldu

Azərbaycan ordusu bütün yay və payız ayları ərzində Naxçıvan istiqamətində neytral ərazilər boyu irəliləyib və demək olar əksər strateji yüksəklikləri nəzarətə götürüb.

Bu sensasion məlumatı həvəskar peyk çəkilişlərinə istinadla “Bellingcat” saytı yayıb. Azərbaycan ordusunun necə irəlilədiyi və Ermənistan ordusunun cəbhənin bu istiqamətində tamamilə əlverişsiz mövqelərdə qaldığı barədə məqalənin müəllifi isə Avstraliyadakı “Holokost və Soyqırım Araşdırmaları İnstitutu”nun analitiki Masis İngilisyandır.

Masis İngilisyan

Müəllif  “Planet Labs” tərəfindən çəkilmiş yeni həvəskar peyk fotolarına istinadən göstərir ki, Azərbaycan ordusunun mühəndis-istehkam işlərini davam etdirməsi nəticəsində Naxçıvan istiqamətində daha bir strateji post Azərbaycanın nəzarətinə keçib. Peyk fotolarında Azərbaycan silahlı qüvvələrinin Naxçıvan istiqamətində bir vaxtlar neytral ərazi hesab edilən ərazilərdə apardığı hazırkı mühəndis işləri əks olunur.

Qeyd olunur ki, Azərbaycan ordusunun təmas xəttində neytral ərazilər boyu irəliləməsi 1994-cü ildə atəşkəsin əldə olunmasından bəri əsasən Dağlıq Qarabağda davam edirdi. Nəticədə bir çox rayonlarda tərəflərin mövqeləri arasında məsafə bir neçə yüz metrə qədər azalıb.

Lakin Naxçıvan sərhədləri boyu irəliləmə atəşkəsin əldə olunmasından bəri Azərbaycan ordusunun ən irimiqyaslı irəliləyişdir. Bunun nəticəsində hərbi əməliyyatların dayanmasından bəri Azərbaycan tərəfi ən böyük ərazini öz nəzarətinə alıb. Müəllif qeyd edir ki, Ermənistan ordusu da 2012 və 2014-2015-ci illərdə Naxçıvan istiqamətində yeni yüksəkliklər tutmaq üçün bu cür taktikadan istifadə edib. Lakin “Planet Labs” tərəfindən təqdim edilən son fotolara əsasən Azərbaycan ordusu regionda mövqelər uğrunda son 10 ildə davam edən mübarizədən sonra hazırda sərhədin bu istiqamətində Ermənistan ordusuna nisbətən daha əlverişli mövqelərdədir.

Bildirilir ki, Azərbaycan ordusunun Naxçıvan regionunda mövqelərini yaxşılaşdırması, o cümlədən yolların çəkilməsi və səngərlərin erməni səngərlərinə yaxınlaşdırılması Qarabağda mümkün münaqişə zamanı ikinci cəbhənin açılmasına gətirib çıxara bilər.  Hansı ki, Azərbaycan son illər Naxçıvanda hərbi iştirakını durmadan artırıb.

Sayt xatırladır ki, Azərbaycan ordusunun Naxçıvan istiqamətində neytral ərazilər boyu irəliləyərək böyük əraziləri nəzarətinə götürməsi ilk dəfə bu ilin yazında “Razm.info” saytının analitiki Ayk Xaçikyanın “Naxçıvanda nə baş verir?” məqaləsindən sonra ictimailəşib. Həmin vaxt Naxçıvan Əlahiddə Ümumqoşun Ordusu 90-cı illərin əvvəllərində tərk edilmiş və Ermənistan ordusunun atəşi altında olan Günnüt kəndi (Şərur rayonu) də daxil olmaqla 11 min hektardan çox ərazini nəzarətinə götürüb. Qızılqaya yüksəkliyini tutub və nəticədə Ermənistan ərazisindən Qarabağa gələn strateji əhəmiyyətli Yerevan-Gorus-Laçın avtomobil yoluna nəzarət etmək imkanı qazanıb.

Lakin yeni peyk fotoları təsdiq edir ki, Azərbaycan silahlı qüvvələri Naxçıvan istiqamətində irəliləməni bununla dayandırmayıb. Bütün yay və payız ayları ərzində mühəndis işlərini davam etdirib və yeni əlverişli mövqelər tutub.

Belə ki, peyk fotolarına əsasən Azərbaycan silahlı qüvvələri bu ilin may ayında çəkilən yeni yollarla irəliləyərək təmas xəttinə mövqelərini daha da yaxınlaşdırıb. Arpa çayından şimal-qərbdə yerləşən yüksəklik və dağ massivi bu ilin may ayında Azərbaycan qoşunları tərəfindən hələ tam tutulmamışdı. Amma yeni peyk fotolarına əsasən həmin dağ massivi tamamilə Azərbaycanın nəzarəti altındadır və ora yeni yollar çəkilib.

Yayda və payızın əvvəllərində Azərbaycan həmin dağ massivi boyu yeni mövqelərdə öz qoşunlarını yerləşdirib. Beləliklə, Ermənistan ordusunun birinci müdafiə xətti və ermənilərin hərbi təyinatlı avtomobil yolu bütünlüklə Azərbaycan ordusunun nəzarəti altına düşüb. Habelə Azərbaycan erməni mövqelərinə doğru yeni səngərlər qazıb.

Digər fotolarda Azərbaycanın Ermənistanla sərhəddə daha bir adsız yüksəkliyə tərəf yeni yol çəkdiyi görünür. Sayt bildirir ki, erməni mövqeləri ilə üzbəüz ərazinin dağlıq relyefi nəzərə alınmaqla Azərbaycan silahlı qüvvələrinin yeni səngərlər qazmağı və yollar çəkməyi davam etdirəcəyini göstərir. Bu da təmas xəttinin həmin istiqamətində erməni mövqelərini tamamilə əlverişsiz vəziyyətdə qoyacaq və istisna deyil ki, Ermənistan ordusu həmin müdafiə xəttini məcburi tərk edəcək.

“Bellingcat” bildirir ki, Azərbaycan silahlı qüvvələrinin yeni manevrləri nəticəsində Ermənistan ordusu faktiki olaraq postlarından birini tərk edib. Sayt peykdən çəkilmiş fotoda ermənilərin tərk etdiyi postu nişan verir. Masis İngilisyan qeyd edir ki, hadisələrin bu cür inkişafı Azərbaycan silahlı qüvvələrinin nəzarətinə keçən ərazilərin erməni infrastrukturu və yaşayış məntəqələri üçün təhdid yaradacağını göstərir. Habelə Azərbaycanın bu əraziləri hərbiləşdirməyə dair gələcək planları barədə suallar meydana çıxarır.

 

Peyk fotoları əsasında təhlil aparan müəllif göstərir ki, Azərbaycan ordusunun son aylarda gördüyü mühəndis işləri nəticəsində erməni səngərləri bütünlüklə əlçatandır və yaxın gələcəkdə ermənilərin həmin səngərləri tərk etməsi qaçılmaz görünür.

Virtualaz.org “Bellingcat” saytının bu məqaləsi ilə bağlı Azərbaycan Müdafiə Nazirliyindən soruşub, nazirlik bu mövzu ilə bağlı şərh verməyib. Xatırladaq ki, bu ilin mayında Müdafiə Nazirliyi Günnüt kəndinin azad edilməsi də daxil olmaqla Naxçıvan istiqamətində ordumuzun keçirdiyi uğurlu əməliyyat barədə geniş məlumat və videoxülasə yaymışdı. (Virtualaz.org)


Yeni metrostansiyanın açılışı 2020-yə qaldı – RƏSMİ

1967-ci il noyabrın 6-da istifadəyə verilən Bakı Metropoliteninin hazırda 25 stansiyası,1 elektrik deposu və 36,6 kilometr uzunluğunda 3 xətti var.
“Bakı Metropoliteni” QSC-nin mətbuat xidmətinin rəhbəri Bəxtiyar Məmmədov modern.az-a tikintisi davam etdirilən stansiya və depolarla bağlı son məlumatları verib.
O qeyd edib ki, hazırda bütün diqqət Bənövşəyi xəttin 3-cü stansiyasının tikintisinə yönəldilib:
“Ceyhun Səlimov küçəsi, Hərbi hospitalın qarşısında, “Papanin” adlanan ərazidə tikintisi davam edən stansiyanın açılışı 2019-cu ilin sonu 2020-ci ilin əvvəllərinə nəzərdə tutulub”.
B.Məmmədov bildirib ki, Memar Əcəmi stansiyasından B-3 (şərti ad) stansiyasına qədər olan tunellərə müasir qaydada yolun çəkilməsi başa çatmaq üzrədir:
“Həmin tunellər 7 vaqonluq qatar üçündür. Orada ilk dəfə dəmir-beton bloklardan istifadə olunur. Mövcud tunellərimizdə isə ağac şpallardan istifadə edilib. Həmin dəmir-beton blokları özümüz istehsal edirik”.
Qurum rəsmisinin sözlərinə görə, Xocahəsəndə Bənövşəyi xəttin, Dərnəgüldə Yaşıl xəttin ikinci deposunun tikintisi aparılır:
“Xocəhəsəndəki deponun 1112 metr uzunluğunda sağ tunelinin tikintisi apreldə başa çatdırılıb. Dərnəgüldəki deponun tikintisi davam etdirilir. Perspektiv inkişaf planına uyğun olaraq yeni xətlərin tunel, stansiya və depolarının inşası ilə yanaşı, mövcud stansiyaların mərhələlərlə yenidən qurulması və müasir avadanlıqlarla təchiz olunması, dərin özüllü bir çıxışlı stansiyaların ikinci çıxışlarının tikintisi nəzərdə tutulub”.
Qeyd edək ki, perspektiv plana əsasən, ümumi uzunluğu 28,5 km olacaq mövcud Qırmızı xətt Badamdar qəsəbəsindən başlayaraq Zığ qəsəbəsinədək uzanacaq. 19 stansiyadan ibarət olacaq xəttin hazırda 13 stansiyası və 1 elektrik deposu istismardadır. Layihədə «İçərişəhər» stansiyasından sonra 4, “Həzi Aslanov” stansiyasından sonra 2 stansiyanın inşası nəzərdə tutulub.
Ümumi uzunluğu 41,8 km olacaq Yaşıl xətt Xətai, Nəsimi, Yasamal, Binəqədi, Nərimanov, Nizami, Sabunçu və Suraxanı rayonlarını əhatə edəcək. Perspektiv inkişaf planına uyğun olaraq, gələcəkdə bu xətt üzrə Bakı metrosunda ilk dəfə qatarların dairəvi hərəkəti təşkil olunacaq. 23 stansiyası olacaq bu xəttin hazırda 10 stansiyası istismardadır. Xəttin bir elektrik deposu hazırda inşa olunur, daha biri isə layihələndirmə mərhələsindədir.
Perspektiv inkişaf planına uyğun olaraq, “28 May” stansiyasının layihəsini dəqiqləşdirərək yenidən qurulmasının başa çatdırılması ilə mövcud Qırmızı və Yaşıl xətlərdə qatarların sərbəst hərəkətinin təşkili nəzərdə tutulub.
Uzunluğu 18,5 km olacaq yeni Bənövşəyi xətt Xocəhəsən qəsəbəsindən başlayaraq Qaraçuxur qəsəbəsinədək uzanacaq. Metropolitenin perspektiv inkişaf planının birinci prioritet istiqamətinə daxil olan Bənövşəyi xəttin «Avtovağzal» və «Memar Əcəmi» stansiyaları 2016-cı il aprel ayının 19-da sərnişinlərin istifadəsinə verilib.
Perspektiv inkişaf planına uyğun olaraq bu xətt üzrə 6-sı keçid olmaqla, 10 yeni stansiya inşa olunmalıdır. Hazırda Xocəhəsən qəsəbəsində Bənövşəyi xəttin deposunun tikintisi davam edir.
Uzunluğu 16,3 km olacaq Mavi xətt Yeni Yasamal yaşayış sahəsindən başlayaraq Sabunçu rayonunun Bakıxanov qəsəbəsinə qədər uzanacaq. Xətt üzrə 7-si keçid olmaqla, 11 stansiya və 1 elektrik deposu tikiləcək.
Uzunluğu 14,7 km olacaq Sarı xətt Binəqədi rayonundan başlayaraq Səbail rayonunun Bayıl qəsəbəsinədək uzanan xətt olacaq. Bu xətdə 5-i keçid olmaqla, 11 stansiya və 1 elektrik deposu inşa olunacaq.
Xatırladaq ki, ötən il qurumdan verilən açıqlamada şərti adı B3 olan stansiyanın 2018-ci ilin sonunda istifadəyə veriləcəyi açıqlanmışdı.

“Müşfiq hamının gözü qarşısında Stalinin “başından” vurur və…” – Alim şok faktı açdı

“Biz ölüb gedəcəyik. Gerçəkləri də özümüzlə aparmağa haqqımız yoxdur. Adamların çoxu 1937-ci ildə Mikayıl Müşfiqlə xüsusi amansızlıqla rəftar edilməsinin səbəblərini heç cür anlaya bilmir. Buna aydınlıq gətirmək istəyirəm”.

Bunu tarixçi-alim Ədalət Tahirzadə deyib.

Tarixçi bildirib:

“Müşfiqin bir binanın zirzəmisində diri-diri divara hörüldüyünü 2003-cü ildə mənə söyləyən dövlət qulluqçusu bunun bir neçə önəmli səbəbini sənədlərə istinadla mənə açıqlamışdı. Onlardan birini xalqa bəyan etmək indi məsləhət deyil. İkisi isə aşağıdakılardır:

Birincisi, Müşfiq indi “Nizami” metro stansiyasının yaxınlığında, “Azad qadın” heykəlinin solunda yerləşən orta məktəbdə müəllim işlədiyi zaman rayon maarif şöbəsinin inspektoru (adı bəllidir) onun dərsini dinləyir. Dərs vaxtı külək pəncərəni açır. Pəncərəyə yaxın oturmuş bir qıza Müşfiq pəncərəni örtməyi tapşırır. Qız örtür. Bir azdan külək yenə açır. Müşfiq ikinci dəfə də örtdürür. Ancaq pəncərə bir də açılır. Üzünü şagirdlərə tutan Müşfiq “Sovet hökumətinin pəncərəsi də belə olar” deyir. Dərsdə iştirak edən inspektor bunu əlüstü yazılı şəkildə NKVD-yə bildirir”.

İkincisi, Müşfiq “Azərnəşr”in ikinci mərtəbəsində yazıçı və şair dostları ilə söhbət edirmiş. Həmin qatda Stalinin yekə bir büstü varmış. Müşfiq hamının gözü qarşısında büstün başını şillələyir və deyir ki, vaxt gələcək, sənin boğazına tros salıb uçuracaqlar. Bunu eşidən “Azərnəşr”in məsul bir işçisi (adı bəllidir) tez NKVD-yə bu haqda məlumat yazır”.

Ədalət Tahirzadənin qənaətinə görə, mərhum şair Mikayıl Müşfiqə qarşı xüsusi amansızlığın səbəbini “Azərnəşr”dəki əhvalatda axtarmaq gərəkdir: “Onun Stalini camaat içində belə aşağılaması Stalinin nökəri Mircəfər Bağırovu hədsiz qəzəbləndirib və nəinki Müşfiqin özü cəzalandırılıb, hətta yoldaşı Dilbər də zindana atılıb və orada dəli olmaq dərəcəsinə çatdırılıb”.

Qeyd edək ki, tarixçi bundan əvvəl Mikayıl Müşfiqin Bakıdakı binalardan birinə diri-diri hörüldüyünü iddia etmişdi. O bu dəhşətli qətlin əmrinin dönəmin Azərbaycan Kommunist Partiyası MK-nın I katibi Mircəfər Bağırov tərəfindən verildiyini bildirmişdi. (teleqraf.com)


Zəng edin, görüşün, müzakirə edin və 15 gündən sonra saytınıza bütün dünya baxsın...
© 2018 ASSA – DİZAYN | Design Theme by: D5 Creation | Powered by: WordPress
Scroll Up