İTV-nin yeni baş direktoru işləməyi bacaranlara təskinlik verdi: “Narahat olmasınlar”

print
Xəbər verildiyi kimi bu gün Milli Televiziya və Radio Şurasında keçirilən seçkidə İctimai Televiziya və Radio Yayımları Şirkətinin (İTV) baş direktoru vəzifəsinə Balakişi Qasımov seçilib.
O, seçkidən sonra jurnalistlərə verdiyi ilk açıqlamasında “Müasir Azərbaycana müasir televiziya lazımdır. Bunun üçün əlimizdən gələni edəcəyik” sözlərini deyib.
Baş direktor qeyd edib ki, tamaşaçı televiziyadakı yeniliyi hiss edəcək: “Çalışacağıq ki, planlarımızı qısa müddətdə həyata keçirək”.
O, televiziyada kadr islahatlarının olacağını da gizlətməyib və işləməyi bacaranlara təskinlik verib: “Narahat olmasınlar”.
Xatırladaq ki, İctimai Televiziya və Radio Yayımları Şirkətinin baş direktoru vəzifəsinə 7 nəfər iddiaçı var idi: “Abbasov Rauf Müzəffər oğlu, Abbasov Səbuhi Mübariz oğlu, Mehrəliyeva Şəfəq Akif qızı, Mehtiyeva Rahilə İbrahim qızı, Xəlilova Qərənfil Əli qızı, Qarayev Sadıq Qurban oğlu, Qasımov Balakişi Ələkbər oğlu”.
İclasda Yayım Şurasının iştirak edən 8 nəfərdən hamısı gizli səsvermədə səslərini Balakişi Qasımova veriblər.
Qeyd edək ki, Cəmil Quliyevin İTV-nin baş direktoru vəzifəsində səlahiyyətlərinə xitam verilib.
MTRŞ İctimai Televiziya və Radio Yayımları Şirkəti baş direktorunun səlahiyyətlərinə vaxtından əvvəl xitam verilməsi ilə əlaqədar olaraq bu vəzifəyə seçilmək üçün namizədin müəyyənləşdirilməsi məqsədi ilə müsabiqə elan edib. İctimai Televiziya və Radio Yayımları Şirkəti baş direktoru vəzifəsinə 7 iddiaçı – Abbasov Rauf Müzəffər oğlu, Abbasov Səbuhi Mübariz oğlu, Mehrəliyeva Şəfəq Akif qızı, Mehtiyeva Rahilə İbrahim qızı, Xəlilova Qərənfil Əli qızı, Qarayev Sadıq Qurban oğlu və Qasımov Balakişi Ələkbər oğlu sənədlərini təqdim edib.
B. Qasımov 20 oktyabr 1978-ci ildə Bakı şəhərində anadan olub. 1999-cu ildə Azərbaycan Dövlət İqtisad Universitetinin Biznes üzrə menecment fakültəsinin Mühəndis iqtisadiyyatı və idarəetmə ixtisasını bitirib. 2001-ci ildə isə eyni universitetin İstehsal sistemlərinin idarəedilməsi fakültəsinin Mühəndis iqtisadiyyatı və idarəetmə ixtisası üzrə magistraturasını bitirib. İTV-nin baş direktoru seçilənə qədər Gametv.az prodüser mərkəzinin rəhbəri vəzifəsində çalışıb. O, eyni zamanda, Azərbaycan Televiziyasında yayımlanan beynəlxalq lisenziyalı “Əlaçı” (“Brainist”), “61!” (“Jeopardy!”), “Breyn-rinq”, “Kim? Harda? Nə vaxt?” verilişlərinin baş prodüseri və rejissoru olub.
Beynəlxalq “Kim? Harda? Nə vaxt?” klubları assosiasiyası tərəfindən 2010-cu ildə ilin adamı seçilib. 2010-cu ilin yekunlarına əsasən, “Büllur bayquş”, “Brilyant bayquş”, “Klubun ən yaxşı kapitanı” poqonu mükafatlarına layiq görülüb.
2017-ci ildə “Kim? Harda? Nə vaxt?” hərəkatının inkişafına verdiyi töhfələrə görə Vladimir Voroşilov mükafatının laureatı olub.
Ailəlidir, 2 övladı var.
Scroll Up