Loading

wait a moment

“Bu şərəfsiz Alışanovu öldürmək istəyirdi…” – Məhkəmə zalından reportaj

print
Bakı Ağır Cinayətlər Məhkəməsində “Azərbaycan Dövlət Televiziya və Radio Verilişləri” QSC-nin (AzTV) sədri Arif Alışanov və yaxınlarını öldürməyə cəhddə, ona qarşı dələduzluq etməkdə və digər cinayətlərdə təqsirləndirilən Şücayət Əkbərov, Qoçəli Cəbiyev, Zöhrab Şirinov və Aqşin Hüseynovun cinayət işi üzrə növbəti məhkəmə prosesi keçirilib.

Prosesdə AzTV sədrinin sürücüsü Hacı Babayev tərəflərin suallarını cavablandırıb. Bildirib ki, torpaqların alqı-satqısını təqsirləndirilən Ş.Əkbərov həyata keçirib: “Mən yalnız sənədlərə qol çəkmişəm. Torpaqların alınması üçün Arif Alışanov mənim adıma etibarnamə verməyib. Şücayət torpaqları Arif müəllimin pulu ilə alırdı. Torpaqların alınması məsələsini də Şücayətdən Arif Alışanovun özü xahiş edirdi”.

Zərərçəkmiş ifadəsində bildirib ki, təqsirləndirilən şəxslər tərəfindən sui-qəsd olunan zaman ona heç bir zərər dəyməyib. Təqsirləndirilən Ş.Əkbərov isə qeyd edib ki, A.Alışanov H.Babayevin adına 340 hektar torpaq alıb və həmin torpaqlara 7 milyon manat pul verib”.

Daha sonra prosesdə şahid qismində A.Alışanovun qaynı Vidadi Cəfərov dindirilib. O, ifadəsində kənd təsərrüfatı qurmaq məqsədilə 200 min manat pul verdiyini, 2017-ci ildə isə Arif Alışanovun aldadıldığını eşitdiyini göstərib. Şahid təqsirləndirilən şəxsləri “şərəfsiz” adlandırıb. “Bu şərəfsiz Alışanovu öldürmək istəyirdi”– o, üzünü dəmir barmaqlıqlar arxasında oturan Şücayət Əkbərova tutaraq deyib.

Bu zaman Ş.Əkbərovla şahidin arasında mübahisə yaranıb. Onlar bir-birlərini söyüblər. Hakim şahidi zaldan çıxarıb.

Digər şahid Etibar Bağırov isə ifadəsində A.Alışanova 1 milyon 800 min manat pul verdiyini deyib: “Arif müəllim də pulu Şucayətə verib. Belarusda biznesim var, özüm də idman müəllimiyəm”.

Şahidlərdən Kamal Camal da ifadə verib. O, AZTV-də çalışdığını, A.Alışanovun “müəyyən işlərini” gördüyünü bildirib. Amma söhbətin hansı işlədən getdiyini deməyib. O, bir neçə torpaq alqı-satqısında iştirak etdiyini ifadə edib: “Arif müəllim pulu Şücayətə verirdi, o da sayıb götürürdü”.

Şahidin dindirilərkən Ş.Əkbərovla onun arasında mübahisə yaranıb. Ş.Əkbərov şahidi təhqir edib. Məhkəmə təqsirləndirilən şəxslərin zaldan çıxarılması barədə qərar verib. Yalnız A.Hüseynov məhkəmə zalında saxlanılıb. Proses onların iştirakı olnadan davam etdirilib.

Daha sonra şahid qismində A.Alışanovun qardaşı ifadə verib. O bildirib ki, 2012-ci ildən torpaq alınması ilə bağlı qardaşı A.Alışanovla məsləhətləşib. O, ifadəsində qardaşına 200 min manat pul verdiyini, lakin özünün Şamaxıya getmədiyini deyib. (İnarə Rafiqqızı, Virtualaz.org)

Scroll Up