Home / Cəmiyyət  / Sevmədiyin qadınla bir damın altında… – GÜNÜN ŞEİRİ

Sevmədiyin qadınla bir damın altında… – GÜNÜN ŞEİRİ

Şeirlər vardır, yazıldığı gündən dillərə, könüllərə düşən

Şeirlər vardır, yazıldığı gündən dillərə, könüllərə düşən… İllər ötüb keçsə də yaddaşın bir küncündə, dilin ucunda qalan…İnsan yaşa dolsa da heç zaman qocalmayan, hər zaman öz estetik təravətini saxlayan, vəsf etdiyi duyğular qədər təmiz, saf və əbədi olan şeirlər… Kulis.az-ın “Günün şeiri” layihəsində bu şeirlər yada salınır. Bu ölməz şeirlərə yeni könüllər, yeni könül evləri, yeni sevgilər tapmaq üçün… Şeirləri çoxaltmaq üçün…

 

Sevmədiyin qadın

 

Sevmədiyin qadınla bir damın altında yaşamaq,
nə onu aldatmaqdı, nə də özünü.
sevmədiyin qadınla bir damın altında yaşamaq,
sevgidə zibillik kimi eşələnməkdi,
yemirsən, amma nəsə axtarırsan orda.
Sevmədiyin qadınla bir damın altında yaşayırsansa,
deməli, taleyindən Həmzə Qıratı qaçırıb.
Sevmədiyin qadınla bir damın altında yaşayırsansa,
axşamlar evinin qapısı tabut ağzı kimi açırsan.
Və hələ taleyin tərs üzü kimi uşaqlar da varsa,
Deməli, içindəki bütün sevincləri yağmalayıblar.
Sevmədiyin qadınla yaşadığı evə gəlmir kişi,
Öyrəşdiyi dərdlərin tüstüsünə gəlir hər axşam.
Sevmədiyin qadınının açdığı süfrədə limonadlar da şərab kimidi.
Kişi öz bədbəxtliyindən sərxoş olur.
Sevmədiyin qadınla bir damın altında yaşamaq püşkünə düşübsə,
Evdə uşaqlar,
Həyətdə ağaclar.
Dibçəkdə güllər də
Gec böyüyər.
Bütün anlar zaman çevrilər.
Sevmədiyin qadınla bir damın altında yaşayırsansa.
Rus bazarlarındakı saxta çeçen dolları kimi olarsan
əldən-ələ, dildən-dilə düşə-düşə xərclənərsən.
Sevmədiyin qadınla bir damın altında yaşayırsansa,
Sənə yenidən doğulmaqdan özgə çarə görmürəm.

Fərid Hüseyn

Review overview